Аналитичари за „Политико“: Нема причина ЕУ да ја слави очекуваната победа на демократите во САДДоколку демократите поминат добро како што се очекува на денешните избори за Конгресот, веројатно нема да им донесат автоматско олеснување на Европејците и постои ризик од нови спорови и построги барања од другата страна на Атлантикот, сметаат аналитичарите. Во анализа на „Политико“, се проценува дека по изборите, претседателот Доналд Трамп, кој би бил ограничен дома, би можел да продолжи да се фокусира на надворешната политика и трговијата, каде што американската извршна власт се соочува со релативно мала контрола од Конгресот. „Би било грешка Европејците да претпостават дека ќе има потопли трансатлантски односи“, рече германскиот дипломат и поранешен шеф на Минхенската безбедносна конференција Волфганг Ишингер. „Претпоставувам дека ќе се случи токму спротивното“, додаде Ишингер за бриселскиот портал. Неодамнешна анкета во ЕУ покажа дека 58 проценти од испитаниците ги поддржуваат демократите, а само 18 проценти ги поддржуваат републиканците на Трамп. Иако анкетите покажуваат дека желбите на европските критичари на Трамп ќе бидат исполнети, според Ишингер, тие треба да избегнуваат триумф или фалење. „Ќе има гласови во Европа, некои важни, кои ќе сакаат да слават и да им честитаат на демократите, но мислам дека тоа би било „отровно““, изјави Ишингер за Политико. „Ги советувам моите европски пријатели да се воздржат и да избегнуваат создавање изговор за Белата куќа да биде лута на Европа – повеќе отколку што веќе е“, додаде германскиот политички ветеран. Некои аналитичари, меѓутоа, се скептични дека воздржаноста ќе направи некаква разлика, вклучително и поранешната советничка на двајца шефови на дипломатии на ЕУ, Натали Точи. „Искрено, не мислам дека на Трамп навистина му требаат причини или изговори за да ја нападне Европа“, рече Точи. Таа додаде дека ќе биде тешко да не се слави ако „се грижите за демократијата“, со оглед на врските помеѓу движењето MAGA на Трамп и популистичките, крајно десничарски политичари во Европа. Неуспехот на Трамп, како што е наведено во анализата, би можел да го зајакне духот на европските либерали и центристи кои ги искористија изборните порази на Виктор Орбан и Александар Вучиќ како доказ дека популизмот го достигна својот врв или барем стагнација. Таквиот заклучок може да биде преран, со оглед на силата во анкетите на Марин Ле Пен во Франција и неодамнешните победи на Алтернатива за Германија. Меѓутоа, отфрлањето на движењето MAGA би им дало, според Точи, морален поттик на либералите и центристите. Ишингер смета дека победата на демократите во САД нема да направи многу за ЕУ на краток рок, што значи дека преземањето на Конгресот од страна на демократите би имало мал практичен ефект врз Европа, па дури и би можело да ги влоши работите. „Ако Трамп се најде заплеткан во конгресни истраги, постапки за импичмент и ако биде внатрешно ограничен од непријателски настроениот Конгрес, тој сигурно ќе гравитира кон местото каде што Конгресот е слаб – во надворешната и трговската политика“, рече Ишингер. Тој додаде дека Европа мора да се подготви не за похармонични трансатлантски односи, туку за уште поголемо негодување и за уште повеќе барања на Трамп од Европа. Последниот американски амбасадор во НАТО во администрацијата на Џорџ В. Буш – Курт Волкер, го мисли истото. „Не очекувајте големи промени од администрацијата на Трамп“, предупреди Волкер. „Конгресот ќе истражи сè. Тие ќе го истражат Трамп, неговото семејство, семејниот бизнис на Трамп, Стив Виткоф и Џаред Кушнер, Елон Маск, Пит Хегсет и Кеш Пател во ФБИ. Трамп ќе се бори против тоа до крај и тоа ќе биде голем циркус“, изјави Вокер за Политико. Според него, демократите ќе бидат за поголема поддршка за Украина и НАТО, но не можат да го насочат Трамп кон тоа. Како што додаде, тие можат да ги одобрат парите, но не и да влијаат на Трамп да ги троши за таа цел. Поранешниот американски амбасадор, исто така, рече дека не е сигурен во кој правец ќе оди Трамп во однос на Иран, додека, кога станува збор за НАТО и намалувањето на ангажманот на американските сили во Европа, тој ќе биде претпазлив од страв од реакциите дома. Бронвен Мадокс, директорка на Институтот за меѓународни односи „Чатам Хаус“ во Лондон, рече дека е „исклучително тешко“ да се предвидат потезите на Трамп. „Можеби ќе се повлече по првичното негодување за резултатот од изборите и да се фокусира на планираните споменици, вклучувајќи ја и балската сала во Белата куќа“, рече таа. Мадокс не гледа причина за славење, без оглед на исходот од изборите, и вели дека европските лидери треба да се фокусираат на тоа колку се промениле САД. „Американските гласачи двапати го избраа Трамп и дури и доколку сега се вртат против него, тие избори покажуваат дека нивниот фокус е свртен кон внатре“, рече Мадокс. Таа, исто така, рече дека Европејците бавно ја разбираат важноста на движењето MAGA и колку долго може да преживее. Таа, исто така, рече дека верува не е доволно препознаено колку се променил американскиот политички пејзаж, вклучително и Демократската партија. „Не мислам дека Америка се гледа себе во Европа на истиот начин како што се гледаше порано. Таа порака ми е јасна веќе некое време“, рече Мадокс. | Либертас